LA UNION – Presyo ti bagas, apit ken supply a bagas ditoy pagilian iti immuna a dinakamat ni Presidente Ferdinand Marcos Jr. iti maikatlo nga State of the Nation Address (SONA) ita nga aldaw, Hulyo 22, 2024.
Kinuna na a saan man a naipatungpal iti P20/kilo a bagas, ngem inaramid amin a kabaelan ti gobyerno a maibaba ti presyo ti bagas iti mercado.
Kinuna na nga impatungpal na iti price cap iti bagas idi napalabas a tawen, tapno makontrol ken maatipa iti panag-ngato ti presyo.
Impanakkel na iti ngimmato nga apit nga irik dagiti mannalon a 20-milyon a tonelada, maibilang a kangatuan sipud idi 1987.
Nupay kasta, katukad laeng daytoy kunana iti 13-milyon a tonelada a bagas, idinto a ti kasapolan ket 16-milyon a tonelada tapno masungbatan iti kasapolan ti pagilian.
Kinuna pay ti Presidente a pammaneknek ti agtultuloy a suporta ti gobyerno iti sektor ti agrikultura ken consumers iti panangipatungpal ti ad-adu a kadiwa stores iti naduma-duma a paset ti pagilian, a pakailakwan iti produkto dagiti mannalon ken pakagatangan iti nalak-laka a presyo.
Saan met a sinardengan ti gobyerno a labanan ti rice smuggling. Kinuna na a dagti nakumpiskar a bagas ditoy pagilian ket naibunong kadagiti nakurapay a pamilya a Pilipino.
Kabayatanna, iti maikatlo nga SONA ni PBBM iti nang-marka iti panaglukat ti maikatlo ken maudi a regular session ti 19th Congress.
Ni House Speaker Ferdinand Martin Romualdez iti opisyal a nanglukat iti Third Regular Session ti 19th Congress sakbay iti SONA ni President Marcos Jr. idiay Batasang Pambansa, Quezon City.
