Kiniddaw ni Manila 2nd District Representative Rolando Valeriano iti Commission on Audit (COA) ken Anti-Red Tape Authority (ARTA) a mangisayangkat iti naisina wenno nagtipon nga special audit iti Philippine Health Insurance Corporation wenno PhilHealth.
Ti panggep ket tapno maammuan no apay a naliwayan ti PhilHealth dagiti remittances-na kadagiti ospital ken database management.
Para kenni Valeriano, dagiti natakuatan iti 2023 audited financial statements ti PhilHealth ket umdasen a pagbasaran ti COA ken ARTA a mangisayangkat iti naun-uneg pay nga audit.
Kangrunaan a dinakamatna ti saan a kompleto ken saan nga umiso a iseserrek ti nasurok a 1.3 a milion a benepisiario a nangigubuay iti doble wenno maulit-ulit a panagpalista iti PhilHealth Members Information System.
Dinakamat pay ni Valeriano ti duplicate ken multiple entries para iti nasurok 266,000 a senior citizen members a katupag ti P1.333-B subsidy kasta met iti pannakairaman ti nasurok 4,000 a pimmusay a senior citizen members database ken billings.
Binabalaw na pay ti kaawan ti policy wenno allagaden ti PhilHealth iti premium contributions ken expanded benefits para kadagiti single parents ken persons with disabilities (PWDs) isu a saan a maited kadakuada dagiti benepisio kas maiyannurot ti linteg.
