BR LA UNION – Agtaltalinaed a Super Typhoon ti bagyo “Bavi” iti ruar ti Philippine Area of Responsibility (PAR), a maawagan ti bagyo “Inday” nu sumrek iti pagilian.
Naudi a nasaripatpatan ti bagyo iti kaadayu 2,790 kilometro daya ti Eastern Visayas.
Kabuyog ti angin nga umabot ti 205 kilometro kada oras asideg iti sentro ken kapegges a dumanon iti 250 kilometro kada oras.
Dup-dupagenna ti pa-laud iti kapartak a 10 kilometro kada oras.
Namnamaen a sumrek iti PAR ti bagyo “Bavi” inton Miyerkules (July 8).
Posible a maingato a nasap-sapa iti wind signals iti sumagmamano a paset ti Northern Luzon mangrugi inton Martes sakbay a sumrek iti teritoryo ti Pilipinas.
Iti forecast ti PAGASA, posible a dumalan ti bagyo asideg iti Extreme Northern Luzon.
Ti kangatuan a wind signal nga ipangato ti PAGASA gaputi bagyo Inday ket Signal #2 ken #3 ngem saan a maikkat ti posibilidad a maingato iti Signal #4 idiay Batanes.
Ti nasao a bagyo ket namnamaen a papigsaenna ti habagat iti sumaruno a lawas, a mangigubway iti nalawa a panagtudtudo ditoy pagilian, partikular iti laud a paset ti Luzon, Visayas ken Mindanao.
Mabalakadan ti amin nga agbalin nga alerto ken amwen ti kasasaad ti panawen, partikular dagiti residente iti Northern Luzon a posible a makapadas iti direkta nga epekto ti bagyo.
Nupay kasta, mabalin pay nga agbaliw ti nasao a forecast.
Kabayatanna, agtultuloy a makaapekto ti easterlies iti daya a paset ti Luzon ken Visayas a mangigubway ti nabara ken nadagaang a panawen, agraman iti posibilidad a panagtudo ken thunderstorms.
