LA UNION – Awan iti agilem-lemmeng ti well milled rice kadagiti rice retailers ditoy siyudad ti San Fernando, ngem limitado laeng ti mailako iti tunggal customer, tapno makagatang iti amin a kayat na ti gumatang ti nasao a klase ti bagas.
Inlawlawag ni Jasmin Bolasco, agdama a bise-presidente ti Grains Retailers Confederation of the Philippines (GRECON), San Fernando City, La Union kabayatan ti interview kenkuana ti Bombo Radyo La Union nga amin a rice retailers iti public market ditoy siyudad ket agilaklako ti P45 kada kilo a well milled rice.
Kinuna na nga agtultuloy iti panaglako da kas panagtungpal iti EO 39 nga impaulog ni President Ferdinand Marcos Jr.
Nu maipapan iti ayuda a P15-k para kadagiti apektado a rice retailers, mangnamnama da a makaawat dagitoy, ngem iti agdama ket awan pay ti masinunuo nu siasino dagiti makaawat ti ayuda.
Maibasar iti impormasyon, iti implementasyon ti price ceiling iti bagas ket agpaut ti dua a bulan.
Namnamaen dagiti rice retailers a saanen a ma-extend ti nasao a linteg agsipudta isuda ti kakaasi a babassit a retailers nu agpaut pay ti EO 39, gaputa kaipapanan daytoy a dumackel met ti pukaw wenno lugi da a negosyante.
Para kenni Bolasco, nasay-sayaat nu agsubli koma iti sigud a presyo ti commercial rice a kangrunaan a gat-gatangen dagiti consumers a P38/kilo tapno kabaelan latta ti gumatang dagiti agbad-badyet a pamilya.
