Inakusaran ti militar ti Thailand iti Cambodia a naglabsing iti ceasefire agreement kalpasan ti dua nga aldaw manipud iti panagbalin nga epektibo daytoy babaen ti panakiballaet ti pagilian a Malaysia.
Segun iti Thailand, naaddaan ti insidente ti rinupak kadagiti tallo a lugar partikular iti biddeng ti dua a pagilian idi Miyerkules.
Nagballaag iti Thailand a no agtultuloy iti agresyon ket posible a nalablabes iti aramiden da a panagibales.
Iti ceasefire ket resulta ti lima nga aldaw a gubat a nakatayan ti nasurok 43 nga indibidwal ken nangpaalis iti nasurok 300,000 a sibilyan ti nagsinungbangir a dasig.
Nagun-od iti katulagan babaen iti tulong ni Malaysian Prime Minister Anwar Ibrahim ken US President Donald Trump, a nagpangta a saan nga agdur-as iti negosasyon pangkalakalan ti Estados Unidos idiay Thailand ken Cambodia no agtultuloy iti nasao a gubat.
Segun kenni Major-General Winthai Suvaree, tagapagsarita ti Thai Army, nagaramat ti babassit nga armas ken grenade launchers dagiti pwersa ti Cambodia sadiay Sisaket province a nangiduron kadakuada a bumales kas depensa.
Nainget met nga pinaglibakan ti Cambodia iti pammabasol ken impetteng a makaallilaw daytoy ken makadadael laeng ti panagtalek iti nagbaetan ti dua a pagilian.
Kabayatanna, awan pay ti naipadamag a panagusar ti heavy artillery kalpasan iti ceasefire kasta met iti panagsunod dagiti tropa manipud iti nagsinungbangir a dasig.
Manamnama nga agtaripnong dagiti defense ministers ti Thailand ken Cambodia inton Agosto 4 idiay Phnom Penh para iti tarigagay a mapatibke pay iti nasao a katulagan.#
