LA UNION – Inarestar iti nagtipon a puwersa ti Rosario Police Station, PDEA, ken dadduma pay nga operational support units ti PNP, iti maysa a negosyante a maibilang a Top 10 high value target individual iti Regional Level.
Binigbig ni Police Major Gerardo Macaraeg, acting Chief-of-Police idiay Rosario, La Union iti suspek a ni Jesus Joaquin Ramos, residente ti Purok 2, Barangay Concepcion ti nasao nga ili.
Maiyannurot iti search warrant nga impaulog ti korte, sinukimat dagiti otoridad iti pagtaengan ti suspek.
Nagresulta daytoy iti pannaka-kumpiskar iti aganay 6 a transparent plastic sachet iti maipagarop a shabu, agdagsen ti nasurok kumurang a 2.8 grams ken mapatta-patta nga agbalor ti nasurok P19,000.
Malaksid dayta, kinumpiskar pay dagiti otoridad iti maysa a 38 revolver ken adda karga na nga innem a bala.
Sumangsango ita ti suspek iti kaso a panaglabsing iti Republic Act No. 9165 ken Republic Act No. 10591.
Mainaig ti daytoy, nag-patigmaan ni Major Macaraeg kadagiti umili idiay Rosario nga iti pulisiya ket kanayon a naka-monitor kadagiti indibiduwal nga adda pakainaigan na iti transaksiyon ti iligal a droga.
