LA UNION – Nagballigi iti Northern Luzon Command (NOLCOM) ti Armed Forces of the Philippines a nangparmek iti lima a nangangato nga opisyal iti terorista a grupo nga NPA-Northern Luzon, a pakaibilangan ti makunkuna a Top Leader ti Komiteng Rehiyon Cagayan Valley a ni Gil Peralta alyas “Ka Elmo”.
Iti eksklusibo a pannakiuman ti Bombo Radyo La Union kenni Major Israel Galorio, Public Information Office chief ti NOLCOM, kinunana a ti pannaka-kemmeg dagiti lima a rebelde nga addaan ti nangato a posisyon iti NPA nga agop-operate iti Northern Luzon, ket babaen iti naiyisyu a warrant of arrest kontra kenni Peralta.
Daytoy ket babaen iti nagbinnulig a puwersa ti AFP ken PNP.
Naarestar dagitoy iti nagsisina nga operasyon dagiti otoridad idiay Quezon City ken Bulacan.
Dagiti naaresto ket pakaibilangan ni Gil Peralta alyas Ka Elmo, maibilang a top leader ken agpapaay a sekretaryo iti Komiteng Rehiyon Cagayan Valley ken dagiti agserserbi nga staff na nga isuda: Irene Agcaoile alyas Ayang; Lourdes Bulan alyas Simang; Arcadio Tangonan alyas Tiago; Roy dela Cruz alyas Bonel; ken Natividad Santos.
Kagiddan ti pannaka-aresto dagiti rebelde, iti pannaka-rekober iti naduma-duma a nangangato a kalibre ti armas.
Dagitoy ket sumangsango iti heinous crimes a kas ti murder, multiple murder, multiple attempted murder, arson, ken robbery.
Segun kenni Maj. Galorio, ikag-kagumaan da itan a parmeken iti rebelde a grupo, nangruna ket binilin ida ti Presidente idi pay nangrugi nga agtakem a gibusan ti insurhensiya ditoy pagilian agingga nga agleppas ti termino daytoy.
Kabayatanna, mamati ni Maj. Galorio nga awanen ti kabaelan iti rebelde a grupo nga agkikil para iti permit to win ken permit to campaign kadagiti kandidato para iti 2022 elections.
Kinunana a gapu kadagiti nagsasaruno nga accomplishments ti AFP ken panag-withdraw iti adu a supporters ti NPA a nagsublin iti sidong ti gobyerno, saanen a makaaramid pay ti maikaniwas dagiti nabatbati a rebelde.
Innayon na a nasurok sangaribu a supporters ken members ti NPA iti Northern Luzon iti simmuko kadagiti otoridad ita laeng a tawen.
