SINGAPORE – Sorpresa a simmangpet idiay Singapore ni Ukrainian President Volodomyr Zelensky para iti Shangri-La Dialogue conference.
Apaman a simmangpet iti conference venue, nag-post a dagus ti statement iti social media platform, ket imbaga na, a plano na ti makisinnarak kenni U.S. Defence Secretary Lloyd Austin tapno pagsaritaan ti suporta para iti pagilian-na nga agingga ita ket at-atakaren ti kaarruba-na a pagilian a Russia.
Kinuna na a tarigagay na a makagun-od ti suporta manipud iti Asia-Pacific region para iti peace summit a nakatuding inton Hunyo 15-16 idiay Switzerland.
Maibasar iti statement ni Zelensky, plano na ti mangangay ti sumagmamano a pannakitaripnong, kangrunaan-na kenni Singapore President Tharman Shan-muga-ratnam ken Prime Minister Lawrence Wong, Timor-Leste President José Ramos-Horta, U.S. Defence Secretary Austin, ken kadagiti Singaporean investors.
Segun iti maysa nga U.S. official, manamnama a makisinnarak ni Zelensky kadwana ni Ukrainian Defense Minister Rustem Umerov kenni Austin tapno pagsasaritaan ti agdama a kasasaad ti magub-gubat a Ukraine ken tapno ipaganetget ti commitment ti Estados Unidos a tulongan a mangidepensa iti pagilian maibusor iti agtultuloy nga agresyon ti Russia.
Kinuna ti International Institute of Strategic Studies (IISS), a nang-organisar iti security conference, a makipaset ni Zelensky iti diskusyon ita nga aldaw ti Domingo a napauluan iti “Re-Imagining Solutions for Global Peace and Regional Stability”.
