LA UNION – Nabuntog ken arigna saan a puman-panaw iti bagyo Henry iti Philippines sea partikular iti kabaybayan a paset ti daya ti Batanes.
Segun iti PAGASA, naudi a nasaripatpatan iti sentro ti bagyo iti kaadayu a 390 kilometers daya ti Itbayat, Batanes.
Kabuyog na iti kapigsa ti angin a 175 kph ken kapegges a dumanon iti 215 kph.
Nakabayog pay laeng iti tropical cyclone wind signal 1 idiay Batanes ken northern portion ti Babuyan Islands.
Kabayatanna, timpuar ken agraraira ita ti Southwest Monsoon iti lumaod a paset ti Central ken Southern Luzon.
Idiay Batanes ken Babuyan Islands ket makapadas iti napigsa a panagtudo ken napegges nga angin a gapwanan ti bagyo HENRY.
Posible iti panaglayos ken landslides kadagiti nasao a lugar.
Kabayatanna, idiay Metro Manila, Ilocos Region, nabatbati a paset ti Cagayan Valley, Cordillera Administrative Region, Central Luzon, CALABARZON, MIMAROPA, ken Western Visayas ket nalulem ti panawen, mabuyogan iti mawaras-waras a panagtudo ken panaggurru-od kas epekto ti trough ti bagyo Henry ken Southwest Monsoon.
Idinto nga iti nabatbati a paset ti pagilian ket apagapaman a nakuyem iti tangatang a mabuyugan iti mapatto-pattok a panagtudo ken panaggurru-od nga epekto ti Localized Thunderstorms.
Posible latta iti panaglayos ken panagregga-ay ti daga kadagiti nasao a lugar nu adda iti napigsa ken napaut a pannakaibuyat ti tudo.
