LA UNION – Tallo iti natay ken 5 pay nga indibiduwal iti maag-agasan iti ospital idiay Agoo, La Union kalpasan a naaksidente iti nagluganan dagitoy a Victory Liner, agarop alas 10:40 idi bigat kalman, Enero 3, 2023 iti kawatiwatan ti Aspiras Highway a masakupan ti Brgy. Cares, Pugo, La Union.
Iti eksklusibo a pannakiuman ti Bombo Radyo La Union kenni Pol. Captain Myla Gavina, deputy-chief-of-police ti Pugo Police Station, kinumpirma na iti pannakatay ti conductor ti bus a ni Josefino Rombaoa, agtawen ti 28, addaan asawa, residente ti Nibaliw East San Fabian, Pangasinan.
Kabilang pay a natay iti dua a pasaheros nga isuda: Mervilyn Lagmay, agtawen ti 26, residente ti West Tapinac, Olongapo City, Zambales ken Hydelene Hufalar, agtawen ti 23, residente ti Brgy. Biday San Fernando City, La Union.
Da Rombaoa ken Lagmay ket naideklara a dead-on-arrival idiay RHU-Pugo babaen kenni Dr. Jossane Lilac Wadwadan De Castro.
Bayat a ni Hufalar ket pimmusay bayat a matam-taming idiay La Union Medical Center, Agoo, La Union.
Segun kenni Capt. Gavina, maibasar iti inisyal nga imbestigasyon dagiti otoridad, iti Victory Liner Bus, addaan ti plate number CXT 468, ket addaan ti 44 a pasaheros pakairamanan ti conductor ken driver a ni David Arcillana, agtawen ti 54, addaan asawa ken residente ti Brgy Baesa, Quezon City.
Naggapo da idiay Baguio City nga agturong koma idiay Cubao, Quezon City idi maaksidente dagitoy iti pasalog ken pakurba a paset idiay Barangay Cares, Pugo kalpasan a bimtak ti maysa a kannawan a pilid ti bus, a nagresulta iti pannakapukaw ti kontrol ti driver, isunga indungpar na iti puon ti kayo ti acacia.
Kinuna pay ni Capt. Gavina a posible a nag-panic dagiti pasaheros ket nagdudupodop dagitoy a nagpasango.
Nagsagaba ti nakaru a pannakadun-dunor iti conductor a puon ti dagus a nakatayanna agraman ti dua a pasahero.
Nabigbig met dagiti lima a nasugatan ken agtultuloy a maag-agasan iti ospital isuda: Acheng Kilaban, Perlito Rillorta, Reyan Guilalas, Juliet Gutierez ken Lyn Miggol.
Kabayatanna, iti nakalasat a driver ket adda iti kustodiya ti Pugo Police Station para iti imbestigasyon ken maisag-sagana metten iti kaso a maidatag kontra kenkuana.
