LA UNION – Inarestar met laeng dagiti otoridad idiay Timor Leste ni Expelled Negros Oriental Congressman Arnulfo Teves kalpasan ti sumagmamano nga oras a pannakaruar na iti pagbaludan a Becora Prison idiay Dili, Timor Leste idi malem kalman, Hunyo 10, 2024.
Iti temporaryo a pannakawaya-waya ni Teves idi kalman ket impadamag mismo ti abogado na a ni Atty. Ferdinand Topacio kadagiti kameng ti media.
Nupay kasta, kalpasan ti sumagmamano nga oras, nangiruar ti mensahe ni Department of Justice spokesman Mico Clavano.
Inlawlawag ti Department of Justice (DOJ) nga inarestar met laeng dagiti otoridad idiay Timor Leste iti napatakyas a ni congressman Arnulfo Teves Jr.
Adda iti Becora Prison idiay Dili ni Teves para iti pannakadengngeg ti extraditon daytoy.
Dumar-ay ni Teves iti panagdengngeg kadwa na ni sigud a human rights commissioner Wilhelm Soriano kas representative iti human rights.
Tumakder ni Soriano a testigo iti human rights violations ditoy pagilian.
Kinuna ni DOJ spokesman Mico Clavano, nu agballaygi ti panagdengeg iti extradition case ni Teves, mabalinen a ma-deport daytoy depende iti koordinasyon ti gobyerno ti Timor Leste iti gobyerno ti Pilipinas.
Binabalaw pay ni Clavano iti nagbalin nga iresponsable a waragawag ti abogado ni Teves a ni Atty. Ferdinand Topacio seknan iti pannakawaya-waya ti sigud a kongresista.
Inawaganna iti nasao a waragawag ni Topacio a maysa nga insulto iti dua a pagilian.
Impaganetget ni Clavano a nakapagsumite iti umno nga oras iti DOJ kadagiti dokumento a kasapolan.
Maipalagip a Marso 21 idi imbaga ti Department of Justice (DOJ) nga inaresto dagiti otoridad ni Teves bayat ti panagay-ayam na ti golf.
Daytoy ket kalpasan nga impasidong isuna ti International Criminal Police Organization (Interpol) iti red notice system ken kinanselar pay ti Manila Trial Court iti pasaporte daytoy.
Napatakyas ni Teves idiay House of Representatives gapu iti masansan a panagabsent na iti sesyon, malaksid a nakaswan ti pammapatay gaputa isuna ti matudtudo a mastermind iti napasamak a Pamplona massacre idi 2023 a nakatayan ni Negros Oriental Governor Roel Degamo ken siyam pay a tattao.
