LA UNION – Inlawlawag ti Overseas Workers Welfare Administration wenno OWWA Region One iti maipaay da a tulong iti pamilya ti maysa nga OFW idiay Taiwan a natay gaputi panagpasngay.
Iti pannakiuman ti Bombo Radyo La Union kenni Ms. Nona Marie Ganal, Family Welfare Officer iti OWWA Region 1, matulongan da iti maseknan a pamilya babaen iti panang-asistir dagitoy iti rumbeng nga aramiden wenno proseso iti pannakaiyawid ti bangkay ken bereavement assistance a maawat ti pamilya.
Impaganetget ni Ganal, nga apaman a makumpleto ti maseknan a pamilya dagiti kasapolan a dokumento ket nabibi-it iti pannakaiyawid ti bangkay, ngem nu tarigagayan ti pamilya a maipasidong iti autopsy idiay Taipei ket mabayagan ti pannakaiyawid daytoy.
Base iti record segun kenni Ganal, iti nasao nga OFW ket ni Sheryl Gacutan Cabanban, 28-anyos, rehistrado a miyembro ti OWWA sipud 2017-2019, maysa a factory worker idiay Taiwan, ken saan pay a nagawid sipud nag-abroad idi 2017 segun iti pamilya na.
Napalaos ti panagladingit iti naulila a pamilya Cabanban iti saan da a ninamnama a pannakatay ti OFW nangruna ket ibilbilang da daytoy a bread winner iti pamilya.
Kalikagum ti pamilya Cabanban a maiyawid iti sibubukel a bangkay ken saan a ma-cremate idiay Taiwan.
Maipalagip a natay ti nasao nga OFW gaputa maipagarop a naligsayan ti dara wenno adu ti dara a nagsayasay kabayatan ti panagpasngay daytoy.
Nupay kasta, nakalasat iti maladaga wenno baby girl ken adda daytoy iti natalged a kondisyon.
