Agur-uray manen ti dakkel nga umento ti presyo dagiti produkto a petrolyo inton sumaruno a lawas ti agingga ₱16 kada litro gapo ti agtultuloy a geopolitical conflict a pakairamanan ti Estados Unidos, Israel, ken Iran.
Maibasar iti uppat nga aldaw a trade monitoring iti Mean of Platts Singapore, manamnama a ngumato ti presyo ti diesel ti aganay ₱16 iti kada litro, para ti gasolina – ₱11 ti kada litro, ken ti Kerosene – ₱3.50 iti kada litro.
Inallukoy ni Department of Energy Secretary Sharon Garin dagiti gasolinaan nga in-inuten nga ipatungpal ti price increase kasta met ti panangipaay kadagiti discount promos a makatulong iti epekto na ti publiko.
Impasigurado na met nga adda iti umdas a suplay ti langis iti Pilipinas ti agingga Abril a nasurok-kumurang 50 pay nga aldaw, kabayatan ti koordinasyon ti gobierno kadagiti kompanya ti langis tapno makagun-od iti naparpartak ken posible a nalaklaka a supply.
Pinaregta na met iti publiko nga agtipid iti panangusar ti gasolina, liklikan dagiti awan pagbanagan na a biahe, ken nu mabalbalin ket mangipatungpal dagiti kompanya iti work-from-home setup.
Nagpalagip iti Sekretarya a liklikan ti ag-hoard ti gasolina tapno saan a maapektaran ti delivery ken suplay dagiti gasolinaan.
