LA UNION – Umaboten iti 18 a bangkay iti nakali ken naiya-un dagiti otoridad iti agtultuloy nga operasyon idiay Brgy Sampaloc, Talisay City, Batangas, a mapapati a nakaigaburan a sibibiag iti nasurok 20 a tattao gaputi landslide wenno panagregga-ay ti daga.
Kabilang dagiti immuna a nakali ket iti bangkay dagiti 12 nga ubbing, a nakita a naka-arakop iti nagannak da.
Maibasar iti impormasyon a nakalap ti Bombo Radyo, mangisayangkat ti 24/7 a retrieval operation dagiti rescuers, babaen iti panagusar da iti heavy equipment ken manpower manipud naduma-duma nga ahensiya ti gobyerno, Philippine National Police, ken lokal a gobyerno.
Segun kadagiti otoridad, in-inut iti maar-aramid a panagkali dagiti heavy equipment agsipudta sensitibo iti kondisyon dagiti bangkay dagiti biktima a kaadwan ket ubbing.
Agus-usar pay dagiti otoridad ti K-9 units tapno napar-partak a ma-detect wenno sapolen dagiti biktima.
Maysa a mangparigat iti rescue ken retrieval operations ket dagiti dadackel a bato, dagiti kayo, ken paset ti babbalay a dandani naggi-giddan a nagaburan bayat a mat-maturog dagiti biktima.
