Opisyal nga inendorso ni Bise Presidente Sara Duterte ni Senador Imee Marcos para iti maminsan manen nga panagtaray na iti Senatorial position iti 2025 midterm elections.
Maibasar iti inruar a 31-second video ti Senadora iti Facebook page, inendorso isuna ti Bise Presidente ken agpada da a nakakawes ti kulay black kas panagladingit iti bisin ken krimen nga arigna pasagid iti pananggipit dagiti saan da a kaalyansa.
Iti panag-endorso ti Bise Presidente kenni Senadora Imee ket sumagmamano a lawas kalpasan nga umikkat iti Presidential sister manipud iti senatorial slate ti administrasyon idi Marso 26 ken nagsubli iti panagbalin na nga independent candidate.
Nupaykasta, immunan nga inlawlawag ni Senadora Imee nga agtaltalinaed latta isuna nga independent candidate iti laksid iti panakipaset na kadagiti kampaniya ti Alyansa.
Nagtaud met iti panaglusolos ti Senadora iti Senate slate ti administrasion idi saan nga dinakamat ti kabsatna a ni Presidente Ferdinand Marcos Jr. iti nagan na kabayatan iti kampaniada idiay Cavite idi Marso 21 agsipud ta nagunget iti Presidente kenkuana kalpasan nga indauloan iti imbestigasion ti Senado iti maipagarop nga ilegal a panangarestar ti International Criminal Court (ICC) kenni sigud a Presidente Rodrigo Duterte.#
