BR LA UNION – Nominado ni U.S. President Donald Trump para iti 2025 Nobel Peace Prize gapu iti maipagarop a napateg a papel na iti panangbukel ti tigil-putukan iti baetan Israel ken Iran kalpasan iti maaw-awagan a ”12-day war.”
Base iti report ti local news idiay Amerika, ni U.S. Representative Buddy Carter iti nangidatag ti nominasyon kenni Trump.
Nakailanad iti surat na para iti Nobel Committee, a rinaem ni Carter iti panangidaulo ni Trump a nakatulong kunana tapno malapdan iti mas nalaw-lawa pay a rinnupak idiay Middle East.
Maipalagip a nangrugi ti tensyon gaputi panang-bomba ti Israel iti nuclear facilities ti Iran, napasarunwan iti sinnukat dagitoy ti airstrike ken simmali pay ti Estados Unidos iti panangdadael ti tallo a nuclear facilities ti Iran, ken dagus met daytoy a bimmales babaen iti panangraut ti maysa nga U.S. base military idiay Qatar.
Innayon pay ni Carter, nagbalin a tulbek ni Trump iti napaspas a panagtinnunos ti Israel ken Iran.
Immuna a nai-nominate ni Trump ita a tawen babaen kenni Rep. Darrell Issa gaputi epekto ti panangabak na idi 2024 presidential elections.
Awan pay met ti waragawag iti Nobel Committee seknan iti nominasyon ni Trump.
