BR LA UNION – Impakdaar dagiti otoridad nga agingga iti 8.4 milyon a tattao iti sumagmamano a rehiyon ti pagilian iti mabalin a maapektaran iti napigsa a bagyo nga Uwan, nga addaan iti potensiyal nga agbalin a “Super Typhoon” sakbay nga agdisso iti kadagaan.
Daytoy ket inwaragawag ti Department of Social Welfare and Development (DSWD) maibasar iti predictive analytics.
Karaman dagiti rehiyon a mabalin a maapektaran ket iti Ilocos Region, Cagayan Valley, Central Luzon, Cordillera Administrative Region (CAR), CALABARZON ken Bicol.
Nupay kasta, ti rainband wenno sirkulasyon ti bagyo ket mabalin a dumanon agingga idiay Western Visayas, Negros Island, Central Visayas ken Eastern Visayas, nga immun-una a nakapadas iti rungsot ti bagyo Tino.
Ti bagyo Uwan ket mabalin a paka-apektaran iti 5.7 a milyon a residente kadagiti komunidad nga asideg iti igid ti baybay ken 466,000 a pamilya iti hazard area, partikular iti CAR, Ilocos Region ken Cagayan Valley.
Kabayatanna, imbalaag ni Office of the Civil Defense (OCD) Deputy Administrator for Administration, Asst. Sec. Bernardo Rafaelito Alejandro a mabalin a mangparnuay ti napigsa a buyat ti tudo ken makadadael nga angin, iti nalawa a sakopen ti Uwan nga addaan iti radius a 700 kilometro iti adu a lugar.
Ti diametrona a 1,400 a kilometro ket mabalin a mangapektar kadagiti lugar manipud Batanes agingga idiay Bohol.
Nasurok a 8,000 a barangay ti na-determina a posible a maapektaran iti panagreggaay ti daga ken layus gapu iti tudo, maibasar iti datos iti Mines and Geosciences Bureau ti Department of Environment and Natural Resources wenno DENR.
Mainaig iti daytoy, impakdaar ti ahensiya nga ad-adu pay a lugar ti vulnerable gapu iti panaglukneng ti daga gapu iti panagtudo manipud iti kallabes a bagyo Tino, partikular idiay Southern Leyte, Quezon, Sorsogon, Cebu, Capiz, Palawan ken Surigao.
Kas sungbat, inallokoy ti ahensiya dagiti lokal a gobiyerno a mangipatungpal ti pre-emptive ken forced evacuations agingga inton bigat, Domingo, nangruna kadagiti komunidad a nalaka a malayus ken panagreggaay ti daga.
