BR LA UNION – Arestado iti tallo a residente idiay Santo Tomas, La Union kalpasan a maipagarop nga akto a natiliwan da iti panagay-ayam ti iligal a sugal idi Biyernes, Pebrero 6, 2026.
Nabigbig dagiti suspek nga agtawen ti 56, addaan asawa ken mannalon; maysa nga agtawen ti 50, addaan asawa, ken awanan trabaho; ken maysa a 69-anyos a balo, awanan trabaho ken agpapada a residente ti Brgy. Casilagan, Santo Tomas, La Union.
Natiliw dagiti tallo babaen kadagiti nagresponde a kameng ti Santo Tomas Municipal Police Station (MPS) ket nakumpiskar kadakuada ti maysa a set ti plastic playing cards ken kuarta nga aggatad ti PHP 245.00 iti nadumaduma a denominasyon.
Maibasar iti police report, naaramid ti anti-illegal gambling operation agarup alas 2:25 ti malem babaen ti pannakaipatungpal ti Municipal Ordinance No. 1-2019.
Nausar ti Alternative Recording Device bayat ti pannakaaresto dagiti tallo kas paset ti protocol.
Imbes a maibalud, naikkan dagiti tallo ti citation tickets para iti naaramid a panaglabsing ken nawaya-wayaan da kalpasan a nagbayadda ti maiyannatop a multa iti Municipal Treasury Office idiay Santo Tomas.
