BR LA UNION – Natay ti maysa nga 80 anyos a lola kalpasan a nadungpar ti patrol car ti Jagna Municipal Police Station (MPS) iti nagluganan a tricycle idi Domingo, Pebrero 8, iti National Highway idiay Barangay Tangohay, ili ti Dimiao, Bohol.
Nasugatan met iti insidente dagiti tallo pay a pasahero, kabilang iti drayber ti tricycle.
Iti eksklusibo nga interview ti Star FM Cebu kenni PMaj. Rey Olar, spokesperson ti Bohol Provincial Police Office, kinuna na a dumaldalyasat ti dua a lugan iti agpada a direksyon idi mapasamak ti insidente.
Segun kenni Olar, naggapo iti simbaan dagiti biktima bayat a naggapo met iti Regional Trial Court idiay Loay ti patrol car a minaneho ni PSMS Neil Vernel, 42 anyos, tapno agitulod iti dokumento.
Kinuna na, a nagsardeng ti tricycle tapno ibaba koma dagiti biktima, idi aksidente a nadungpar ti patrol car a sumarsaruo.
Gaputi kapigsa ti impact, nadadael iti sangwanan a paset ti patrol car ken naipullasit iti tricycle, a nakaigapwan ti pannakadunor dagiti pasahero ken nakatayan ti lola.
Naidatagan metten ti kaso a reckless imprudence resulting in homicide and damage to property iti drayber a pulis.
Iti agdama, naka-detain daytoy idiay Dimiao Municipal Police Station bayat nga agtultuloy ti imbestigasyon iti nasao nga insidente.
Impalagip ni Olar nga ugalien nga agannad iti panagmaneho.
