BR LA UNION – Natnag dagiti pidaso ti maysa a nagsuwek nga Iranian “Shahed” drone, iti maysa a shopping mall idiay Sharjah, United Arab Emirates (UAE) a nanggubway ti nakaru a perdisyon ken uram, maibasar iti inisyal a report.
Nangparnuay ti napuskol nga asok iti nagsuwek a drone iti nasao a pasdek ken pagam-amkan ti sumagmamano a residente nga adda iti tattao iti uneg ti mall idi napasamak ti insidente.
Dagus met a nagresponde ti emergency team iti lugar.
Agtultuloy iti operasyon dagiti bumbero tapno sebseban ti apoy kagiddan ti isay-sayangkat da nga inspeksyon ken panagsapol dagiti otoridad iti posible a survivor.
Iti agdama, awan pay ti opisyal a waragawag seknan iti posible a natay wenno nasugatan.
Ita nga aldaw ti Domingo, Marso uno, nangipatayab manen ti missile iti Iran idiay UAE bayat a pinabileg pay dagiti otoridad iti depensa ti pagilian.
Maibasar iti report, bimmales manen ti Iran iti maikadwa nga aldaw ti panagatake ti U.S. ken Israel idi Sabado kalpasan a natay iti Supreme leader ti pagilian a ni Ayatollah Ali Khamenei.
Gaputi dayta, posible nga agpaut pay ti sumagmamano nga aldaw ti panagbomba ti Iran iti Gulf states wenno mas napapaut pay.
Inallokoy ti gobyerno ti UAE iti pribado a sektor a palubosan dagiti empleyado nga ag-work from home inton Lunes ken Martes gaputi mapaspasaran a security situation.
