REGION 1 – Nangisayangkat ti Land Transportation Office (LTO) Region I ti Libreng Sakay program ita nga Abril 13, 2026 kas sungbat iti agtultuloy a panagngato ti presio ti gasolina ken tapno matulongan dagiti agbibiahe iti rehion.
Segun iti LTO Region I, panggep ti nasao nga inisiatiba a kissayan ti gastos ti plete dagiti pasahero, nangruna kadagiti aldaw a nangato ti panagkasapulan iti transportasion.
Saklawen ti libre a panaglugan ti sumagmamano a kangrunaan a ruta iti Ilocos Region, pakairamanan ti San Fernando, La Union agingga iti Tagudin, Ilocos Sur, ken Lingayen, Pangasinan agingga iti San Fernando a lumasat idiay Dagupan.
Dua a bus ti naituding para iti programa, nga addaan iti naikeddeng nga eskediul para iti panagbiahe iti agsapa ken malem:
Para iti bus nga addaan iti plaka a CXG 923, rumuar daytoy iti alas-kuatro ti agsapa. Adda met ti afternoon trip nga alas-singko a mangala ken mangibaba kadagiti pasahero iti nadakamat a ruta.
Kabayatanna, ti bus nga addaan plaka nga NBT 1575 ket rumuar iti alas-singko ti bigat manipud Lingayen, Pangasinan nga agturong ditoy Ciudad ti San Fernando. Naituding met ti panagsubli iti oras nga alas-singko manipud Ciudad ti San Fernando agingga idiay Lingayen.
Mapalubosan dagiti pasahero a sumrek ken bumaba kadagiti naituding a lugar a pagkargaan ken pagdiskargaan iti ruta, maitunos kadagiti agdama a linteg ti trapiko ken kinatalged.
Paregtaen ti LTO ti publiko a gundawayan daytoy libre a panaglugan bayat nga itultuloyda nga ipalagip ti tunggal maysa a tungpalenda dagiti safety guidelines bayat ti panagbiaheda.
Daytoy a programa ket paset ti nalawlawa nga addang ti gobierno tapno maited ti tulong iti publiko iti baet dagiti agtultuloy a karit iti sektor ti transportasion. (Report by Bombo Ericka)
