BR LA UNION – Kinumpirma ni Atty. Krissy Conti, assistant to counsel iti International Criminal Court (ICC), nga addan nabukel a Trial Chamber III a mangiggem ti kaso ni sigud a Presidente Rodrigo Duterte seknan iti war on drugs.
Segun kenni Conti, iti ICC ket nangdutok iti tallo a huwes isuda: Judge Joanna Korner, Judge Keebong Paek, ken Judge Nicolas Guillou, tapno denggen iti nasao a kaso.
Innayon na, a ti sumaruno nga addang ket bin-ig nga administratibo ken agkasapolan ti koordinasyon iti baetan ti prosecution, defense, ken victims’ legal teams. Posible a maisayangkat ti status hearing iti private session iti sumarsaruno nga aldaw.
Ti ICC ket rinugyan da ti imbestigasyon ditoy Pilipinas kalpasan dagiti report a rinibu dagiti natay iti sidong ti kampanya kontra droga ni Duterte manipud 2016 agingga 2022.
Idi 2021, pinalubosan ti ICC Pre-Trial Chamber iti full investigation, nga idi agangay ket temporaryo a sinuspinde ngem naituloy met laeng idi 2022.
Laksid iti panagatras ti Pilipinas manipud iti Rome Statute idi 2019, impaganetget ti ICC nga adda hurisdiksiyon daytoy kadagiti krimen a maipagarop a napasamak idi miyembro pay laeng ti pagilian.
Iti panagbukel ti Trial Chamber ket napateg a paset ti proseso, agsipudta ditoy a maluktan iti pormal a panagusig ken matalantan dagiti ebidensiya ken testimonya kontra iti sigud a presidente.
Iti agdama, namnamaen iti nair-irut a koordinasyon dagiti partido tapno maisguro a naannayas iti taray ti proceedings.
