BR LA UNION – Kinumpirma ti Department of Justice (DOJ) a nagsumite dan ti kadawatan para iti Red Notice iti Interpol kontra kenni Sen. Ronald “Bato” dela Rosa.
Segun iti DOJ, paset daytoy ti legal process tapno ipatungpal ti arrest warrant nga inyisyu ti International Criminal Court (ICC) seknan dagiti kaso a crimes against humanity nga adda pakainaiganna iti ‘war on drugs’ campaign ti sigud nga administrasyon.
Imbaga pay ti DOJ a maibilang itan a “fugitive from justice” ni Dela Rosa ket nabilin dagiti law enforcement agencies kas ti Philippine National Police (PNP) ken National Bureau of Investigation (NBI) nga ipatungpal ti panangaresto.
Inlawlawag ti ahensya, iti Red Notice ket maysa nga international alert tapno amwen iti lokasyon ti maysa a tao a maipapaaresto gapu iti sangsangwen na a nadagsen a kaso.
Nagballaag pay ti DOJ kontra iti siasinuman nga aggandat a tumulong iti panaglemmeng iti senador.
Maipalagip a rimwar iti desisyon ti Korte Suprema a nangibasura iti indatag a petisyon a temporary restraining order (TRO) ti kampo ti senador, nga addaan tarigagay a lapdan iti panang-paarestar kenkuana ti ICC.
Iti agdama, saan pay nga ammo iti lokasyon wenno ayan ti senador, kalpasan a naglibas iti premises ti Senado idi parbangon ti Mayo 14, kalpasan ti napasamak a riribok idiay Senado idi Mayo 13.
