BR LA UNION – Inwaragawag ni National Bureau of Investigation (NBI) Director Melvin Matibag nga ipatungpal ti ahensya iti direktiba ni Justice Secretary Fredderick Vida nga iserbi ti arrest warrant manipud International Criminal Court (ICC) kontra kenni Senador Ronald “Bato” Dela Rosa.
Segun kenni Matibag, aramiden da nga awan ti delay iti bilin nga arestaren ti pugante a senador.
Siniguro ti NBI director, nga ipatungpal da ti pammilin a maiyannurot iti allagaden ken iti propesyunal a wagas.
Impaganetget pay ti opisyal, a maarestar iti pugante a senador, kayatna man wenno saan, agsipudta kasapolan a maipatungpal ti linteg nga awan ti buteng wenno mapaboran.
Maipalagip a nangidatag ni Dela Rosa ti petisyon para iti Temporary Restraining Order (TRO) ken Status Quo Ante Order idiay Korte Suprema tapno lapdan ti panangipatungpal ti ICC warrant ditoy Pilipinas, ngem imbasura daytoy ti kangatuan a pagukuman, babaen ti botos a 9-5-1.
Kasaruno ti insidente ti pammaltog idiay Senado idi Mayo 13, siniguro ni Matibag ti sibubukel a kooperasyon ti NBI iti fact-finding panel ti Department of Justice ken impaganetget na iti kari ti ahensya iti maysa a transparent, napudno, ken naurnos nga imbestigasyon.
Innayon na, nakitinnulong metten ti NBI iti Criminal Investigation and Detection Group (CIDG) ti PNP, a nangisayangkat ti sworn statements manipud kadagiti NBI personnel a nakadestino iti GSIS premises idi Mayo 13.
Impaay ti NBI iti CIDG ti access dagiti video recordings, radio communications, ken dadduma pay nga adda pakainaiganna a materyales manipud Mayo 11 agingga Mayo 13 seknan iti napasamak nga operasyon kontra kenni Dela Rosa.
Kabayatanna, siniguro met ti Philippine National Police (PNP) nga agtungpal da iti direktiba ti Department of Justice (DOJ) seknan iti panangipatungpal ti arrest warrant ti International Criminal Court (ICC) kontra kenni Senador “Bato” dela Rosa.
