BR LA UNION – Ad-adalen ita ti Senado nu kasatno a mapapartak ti impeachment trial proceedings a saan a maapektaran ti dadduma pay a napateg nga aktibidad ti gobyerno.
Segun kenni Senate President Sherwin Gatchalian, mapatta-patta a pito agingga walo a bulan ti impeachment trial ni Bise Presidente Sara Duterte.
No mangrugi ti panagusig inton Hulyo 6, posible a maileppas daytoy inton Pebrero ti sumaruno a tawen.
Ngem aminado ti Senate President nga agbalin a narigat ti iskedyul da gaputa maigiddan daytoy iti dadduma pay a napateg a trabaho, kas iti panangtalantan iti 2027 national budget, panagimbestigar kadagiti isyu kas iti maipagarop a problema kadagiti flood control projects ken dadduma pay a gakat.
Gapu iti daytoy, ad-adalen ti Senado nu kasatno a pabiiten ti proseso ti panagusig.
Kabilang dagiti posible nga addang ket iti pannakisarita iti kampo ti prosekusyon ken depensa tapno maksayan ti bilang dagiti testigo ken mapapartak ti pannakaidatag dagiti ebidensiya.
Segun kenni Gatchalian, adda agarup 10,000 a dokumento ken ebidensiya a mabalin a mausig iti nasao a kaso. No saggaysa a pagsasaritaan amin dagitoy, mabalin a napapaut pay ti panagusig.
Nupay kasta, kinuna ni Gatchalian nga ipaulog ti Senado ti pre-trial order ken ikkan ti agsumbangir a benneg iti tallo nga aldaw a mangisubmitir iti komentoda sakbay ti pormal a panangrugi ti trial.
Malaksid dayta, mangipatungpal ti Senado ti naing-inget a seguridad iti uneg ken aglawlaw ti pasdek tapno masigurado ti naannayas a taray ti impeachment proceedings.
Kinuna pay ni Gatchalian a personal nga ad-adalenna ti 2012 impeachment trial ni sigud a Chief Justice Renato Corona tapno makaala kadagiti nota a mabalin nga usaren iti agdama a proseso.
Kinunana a dakkel a paset ti panagsagana ket idaulwan ni Senate Secretary ken Clerk of Court Atty. Rey Bantug, agraman dagiti dadduma pay nga opisyal ti Senado.
