BR LA UNION – Sinuspinde ti Don Mariano Marcos Memorial State University – Mid La Union Campus (DMMMSU-MLUC) ditoy siyudad ti San Fernando, La Union ti serrek dagiti empleyado ken klase dagiti estudyante ti amin a tukad inton bigat, Lunes, Hulyo 27, 2026.
Gapu daytoy ti social media post a bomb threat ti maysa nga indibiduwal kontra iti nasao a pagadalan.
Inladawan ti DMMMSU administration ti nasao a social media post manipud a maysa a pangta, pananginsulto, ken maysa a kita ti panag-probokar maikontra iti nadakamat nga unibersidad, kadagiti estudyante, ken kadagiti personnel.
Kas precautionary measure, sinuspinde ti DMMMSU Admin iti face-to-face classes inton bigat (Hulyo 27) ket maipatungpal ti asynchronous wemmo online class ken work-from-home arrangement kadagiti empleyado.
Siniguro ti unibersidad nga agtalinaed a natalged iti pagadalan kontra kadagiti indibiduwal nga addaan ti dakes a panggep.
Siniguro ti unibersidad a maipaayan ti maiyannatop a legal action ti siasinuman a responsable iti nasao a bomb threat.
Kabayatanna, kiniddaw ti City of San Fernando Police Station iti publiko nga agtalinaed a kalmado ken liklikan ti ag-panic.
Daytoy ti nagbalin a panawagan dagiti otoridad iti publiko kasaruno ti bomb threat-related posts iti social media kontra iti DMMMSU-MLUC ditoy siyudad ti San Fernando.
Dagus a nagtignay ti City of San Fernando Police Station ken naki-koordinar da iti Explosive Ordnance Disposal and Canine (EOD/K9) Unit, ket nangisayangkat da ti maiyannatop a security measures, area monitoring, ken police visibility kas panangresponde iti nasao a bomb threat a naidalan iti social media.
Inallokoy dagiti otoridad iti publiko nga agtalinaed nga alerto ket i-report a dagus kadagiti otoridad nu adda dagiti mapaliiw a mapagdudua-an nga indibiduwal, pakete, ken aktibidad.
Pinalagipan pay ti La Union Police iti publiko a liklikan nga i-share ken i-repost dagiti saan a beripikado nga impormasyon, a mabalin a mangparnuay ti alarma wenno panag-panic.
Siniguro met ti City of San Fernando Police Station, iti pannaki-koordinar iti EOD/K9 Unit, nga itultuloy da nga i-monitor ti sitwasyon ken ipatungpal iti umiso a security measures tapno masiguro ti kinatalged ti publiko.
Malaksid iti DMMMSU-MLUC, pinangtaan pay ni Kepya iti sumagmamano a munisipiyo, merkado publiko, pagadalan, mall ken city hall ditoy siyudad ti San Fernando.
