BR LA UNION – Nakita a tumtumpaw ken maysan a bangkay iti bagi ti maysa a 30-anyos a lalaki iti kabaybayan a sakop ti Barangay San Vicente, ditoy siyudad ti San Fernando, La Union idi Agosto 23, 2026.
Maibasar iti report, ti biktima ket managan Dominador Aguilar Saula, maysa a minero, ken residente ti Barangay Calomboyan, Mangatarem, Pangasinan.
Immuna ti daytoy, mangisay-sayangkat ti Bauang Municipal Police Station ti search and rescue operation iti nai-report kadakuada nga insidente ti pannakalmes idi Agosto 22, idi makaawatda ti impormasyon manipud kadagiti mangngalap mainaig iti nakita a tumtumpaw a bagi ti tao iti kabaybayan.
Dagus a naki-koordinar ti Bauang MPS iti City of San Fernando Police Station tapno agresponde iti report.
Kadwa dagiti otoridad a nagturong iti nasao a lugar iti kameng ti City Health Office, Philippine Coast Guard ken PDRRMC.
Narekobre iti bagi ti biktima iti igid ti kabaybayan a sakop ti Barangay San Vicente ken naideklara a natay gaputi asphyxia, maibasar iti panang-eksamin ti general physician ti City Health Office.
Kabayatanna, naiyawiden ti biktima ken adda itan iti poder ti pamilya na para iti umno a disposisyon.
