BR LA UNION – Kinumpirma ni Department of Justice Spokesperson Atty. Polo Martinez nga imbasura ti Quezon City Prosecutors Office iti reklamo kriminal nga indatag ti asawa ni Vice President Sara Duterte a ni Mans Carpio kontra iti sumagmamano nga opisyal ti gobyerno.
Maipalagip a nangidatag ti reklamo ni Manases kontra kada House Justice Committee Chairperson Rep. Gerville Luistro, House Senior Deputy Minority Leader Leila de Lima, dagiti opisyal ti Bangko Sentral ng Pilipinas, Anti-Money Laundering Council ken dadduma pay.
Segun kenni DOJ Spokesperson Martinez, ti pannakaibasura ket gapwanan ti kaawan ti hurisdiksyon iti kaso wenno ‘jurisdicitional grounds’ agsipudta sakopen daytoy iti Office of the Ombudsman.
“The complaint filed by Atty. Mans Carpio against respondent public officers was dismissed without prejudice on jurisdictional grounds, as jurisdiction over the matter properly belongs to the Office of the Ombudsman,’’ ani DOJ Spokesperson Atty. Polo Martinez.
Kabayatanna, tinakderan ni Rep. Terry Ridon nga umno laeng a maibasura agsipudta awan ti naan-anay a basaran iti reklamo a naidatag kontra kadagiti nasao a miyembro ti komite.
Segun met kenni Akbayan Rep. Perci Cendaña, paset ti constitutional duty ti House Committee on Justice nga amirisen dagiti ebidensya a maiprisinta iti impeachment proceedings tapno madetermina nu adda naan-anay a basaran dagiti alegasyon a nakapauneg iti kaso.
