BR LA UNION – Agkiddaw ti interbensyon iti Department of the Interior and Local Government (DILG) manipud Supreme Court ken Kongreso tapno papigsaen dagiti addang kontra kadagiti insidente ti pammaltog iti pagadalan kasaruno ti napasamak idiay Banga National High School idiay South Cotabato.
Segun kenni DILG Secretary Jonvic Remulla, tarigagay na a palubosan ti Korte Suprema iti Philippine National Police (PNP) a mangisayangkat ti inspeksyon kadagiti pagtaengan dagiti agtagikua ti paltog tapno masiguro iti umno a panangidulin dagiti armas.
Inwaragawag ti sekretaryo a dagiti tallo nga insidente ti school shooting ita a tawen, dagiti rehistrado a paltog a kukua dagiti kameng ti gobyerno iti nausar, isunga rumbeng nga adda ti direkta a sungsungbatan dagiti gun owner para iti umno a panangidulin.
Mainaig ti daytoy, nakikoordinar ti DILG iti Department of Justice (DOJ) para iti maidatag a petisyon idiay Korte Suprema, bayat a nagpanawagan pay ti sekretaryo nga amyendaran ti agdama a linteg mainaig iti gun ownership ken liability.
Malaksid iti isyu ti paltog, tarigagay pay ni Remulla a masungbatan iti impluwensya ti social media ken online community kas ti “true crime” groups kadagiti agtutubo a posible a mangimpluwensiya ti kinadamsak.
Nakatuding a makitaripnong ti liderato ti DILG iti Department of Information and Communications Technology (DICT) ken posible a kumiddaw ti aksyon idiay Kongreso para iti mas nair-irut a proteksyon kadagiti ubbing online, kabilang iti pananglimita iti social media access dagiti menor de edad.
