BR LA UNION – Posible nga umabot iti P1.5 bilyon ti maipagarop a saan a mailawlawag a kinabaknang da Vice President Sara Duterte ken asawa na a ni Atty. Manases “Mans” Carpio manipud 2022 agingga 2025, segun iti prosecution forensic accounting expert a ni Atty. Alexander Cabrera.
Iti maika-38 nga aldaw ti impeachment trial ita nga aldaw ti Lunes, inlawlawag ni Cabrera iti posible a kangatuan a kantidad kalpasan a palut-puten ni Senate impeachment court Presiding Officer Sen. Francis “Chiz” Escudero.
Maibasar iti kuwenta ni Escudero, umabot iti P463.046 milyon ti nabatbati a maipagarop nga unexplained wealth nu maikissay iti P817.87 milyon a pakabuklan iti saan a naideklara a kinabaknang, dagiti kantidad nga adda pakainaiganna iti GenCorp, Cale88 Foods Corporation, ken Metro City Chow Foods.
Nupay kasta, imbaga ni Cabrera a mabalin nga umabot iti P1.5 bilyon ti kangatuan a patta-patta nu iraman iti confidential funds, diperensiya iti financial records manipud AMLC, ken mas nangatngato nga estimate iti GenCorp.
Ni Cabrera iti naudi a testigo ti House prosecution para iti Article II ti impeachment complaint kontra iti bise presidente.
