Naragsakan ni House Deputy Speaker ken Zambales Rep. Jay Khonghun ti pannakaaresto ni Atty. Levito Baligod ken 14 a kameng ti grupo a pagaammo kas “maleta boys,” bayat ti panangiyebkasna iti panagtalek iti sistema ti hustisia.
Naaresto ti grupo idi Biernes, Oktubre 16, idiay San Juan Hall of Justice maibasar kadagiti warrant nga inruar ti Regional Trial Court Branch 69 sadiay Iba, Zambales. Sumangsangoda iti kaso nga unjust vexation mainaig iti Cybercrime Prevention Act.
Nagtaud ti kontrobersia iti alegasion a panangiyawatda kadagiti maleta a napno iti kuarta kadagiti sumagmamano nga opisial ti gobierno mainaig kadagiti kuwestiyonable a flood control projects. Pinaglibakan met ni Khonghun ti pannakairamanna kadagiti alegasion.
Segun iti mammanday-linteg, ti panggep ti panangipilana iti kaso ket tapno idepensa ti naganna, pamilia ken dignidadna, ken saan a tapno agibales.
Impaganetgetna a ti pannakaipaay ti arrest warrant ket saan a kaipapananna ti basol, gapu ta agdesision latta ti korte maibasar iti ebidensia ken linteg.
Inallukoyna pay iti publiko a saan nga iraman ti intero a Philippine Marine Corps iti kontrobersia tapno saan a maapektaran ti reputasion dagiti loyal a soldado gapu kadagiti alegasion a nakairamanan ti sumagmamano laeng nga indibidual.
