Napatakyas iti puwesto dagiti tallo nga opisyal ti Department of Public Works and Highways (DPWH) idiay Davao City a maimimbestigaran mainaig ti maipagarop nga iregularidad kadagiti flood control project iti Ciudad.
Kinumpirma ni DPWH Secretary Vince Dizon iti addang ita nga aldaw ti Lunes, Oktubre 19.
Karaman kadagiti naikkat ni Davao City District Engineer Richard Ragasa, a respondent kadagiti reklamo nga impila ti National Bureau of Investigation (NBI) iti Department of Justice (DOJ).
Im-imbestigaran ti NBI dagiti proyekto a naited iti Genesis88 Construction Inc. kalpasan a makitaan ti posible nga iregularidad kadagiti dokumento ken panangipatungpal kadagiti sumagmamano a proyekto.
Idi Oktubre 13 ken 14, nangipila iti NBI ti reklamo a kriminal kontra kadagiti 21 indibidwal a pakairamanan dagiti opisyal ken kameng ti DPWH Davao District Engineering Office ken dagiti mangibagi ti pribado ti construction firm.
Karaman kadagiti inirekomenda a panaglabsing iti falsification of documents ken Anti-Graft and Corrupt Practices Act.
Maipasidong pay iti panagsukimat ti DOJ dagiti reklamo tapnu maamwan nu adda ti umdas a basaran para iti panangisampa ti kaso iti korte.
Kabayatanna, impasigurado ti DPWH iti pannakitinnulong dagiti otoridad. Nupay kasta, saan a satwen nga iti pannakairaman iti imbestigasyon wenno panangipila ti reklamo a napaneknekanen iti pagsungbatan dagiti respondent.
