Impaganetget ni Education Secretary Sonny Angara ti agtultuloy a pannakaitandudo ti lenguahe a Filipino, kasta met dagiti lokal ken rehional a pagsasao iti pagilian, kagiddan ti pannakarambak ti maika-90 nga anibersario ti Komisyon sa Wikang Filipino (KWF).
Segun kenni Angara, paset ti addang ti Department of Education (DepEd) ti panangpaadu iti bilang dagiti libro a maipatarus iti nadumaduma a lengguahe tapno ad-adu dagiti Pilipino ti maaddaan ti gundaway nga agbasa ken makasuro babaen ti panangusar iti lengguahe a maawatanda.
Dagitoy a panagregget ket maipatpatungpal babaen kadagiti programa ti gobierno a panagipablaak iti libro, iti pannakibinnulig ti National Book Development Board ken dadduma pay nga ahensia a nakaipasidong iti DepEd.
Panggep pay dagitoy a programa nga ad-adda a maparegta dagiti Pilipino, nangruna dagiti agtutubo, a mangpadur-as iti interesda iti panagbasa bayat ti panang-apresiarda iti bukodda a pagsasao ken kultura.
Impaganetget ti sekretario a saan laeng a Filipino ti rumbeng a maitandudo no di pay ket dagiti lokal ken rehional a dialekto a napateg a paset ti kinasiasino ti tunggal komunidad.
Kabayatanna, imbatad ni KWF Chairman Atty. Marites Barrios-Taran dagiti addang nga itultuloy ti komisyon tapnu adadda pay a maisaknap ken mapabaknang ti pagsasao a Filipino.
Karaman ditoy ti pannakaipasek ti adadu a sentro ti lengguahe ken kultura, pannakitinnulong kadagiti lokal a gobierno, nasional nga ahensia, ken pannakapapigsa ti pannakausar ti Filipino iti nadumaduma a lebel ti komunikasion.
