Nanayunan pay iti bilang dagiti casualties kasaruno ti panagduprak ti bagyong Crising ket habagat ditoy pagilian.
Maibasar iti datos ti National Disaster Risk Reduction and Management Council (NDRRMC) ita nga aldaw, Hulyo 21, dumanonen iti lima dagiti nailista a pimmusay manipud kadagiti uppat a nairecord idi napalpalabas nga aldaw.
Segun iti ahensya, ngimmato met ti lima iti bilang dagiti nadundunor bayat a pito dagiti naipadamag a mapukpukaw.
Naberipikan ti NDRRMC dagiti dua a pimmusay ken maysa a nasugatan bayat nga agtultuloy iti validation kadagiti dadduma pay a casualties.
Kabayatanna, dumanon iti pakabuklan a 800,864 nga indibidwal iti apektado manipud iti nasurok a 1,000 barangays.
Agtaltalinaed kadagiti evacuation centers iti agdama dagiti 5,921 a pamilya bayat a 16,671 dagiti adda iti ruar ti evacuation centers.
Numanpay nakaruaren iti bagyo ditoy pagilian idi Sabado, agtultuloy a mabanbantayan iti Severe Tropical Storm Wipha wenno sigud a bagyong Crising ken iti Low Pressure Area (LPA) nga adda iti uneg ti Philippine Area of Responsibility (PAR).
Kabayatanna, nababa ti posibilidad a mabukel kas bagyo iti nasao nga LPA iti sumaruno a 24 nga oras.#
