BR LA UNION – Pinakdaaran ti Department of Health (DOH) iti publiko kontra iti online scam a mangen-endorso kadagiti agas para iti hypertension wenno alta presyon.
Iti advisory nga inruar ti DOH, binalakadanna ti publiko a saan a mamati kadagiti website wenno page a mangtulad iti DOH ken dagiti mangibag-bagi dayty tapno aglako kadagiti produkto a pangagas ti hypertension.
Impaganetget ti ahensiya nga awan ti pammaneknek a dagiti nasao a produkto ket mangagas kadagiti sakit ken saan nga agin-endorso ti DOH kadagiti komersiyal a produkto.
Isunga binalakadanna ti publiko nga agkonsulta laeng iti opisyal a website ti DOH tapno saan a mabiktima kadagiti online scams.
Nagpalagip pay ti DOH kontra kadagiti makaallilaw a marketing strategy nga agus-usar kadagiti peke a testimonial, peke nga endorso manipud kadagiti eksperto, ken external health claims.
Kabayatanna, inreport ti DOH dagiti peke nga account iti Department of Information and Communications Technology (DICT) ken adda metten ti ar-aramiden nga addang tapno mapag-sungbat dagiti adda iti likudan daytoy.
Nabalakadan pay ti publiko nga ireport a dagus dagiti nasao a klase ti fake accounts ken saan koman nga i-share pay.
