LA UNION – Saan a maibilang nga armed attack iti insidente idi June 17 idiay West Philippine Sea kalpasan iti delikado ken agresibo nga aksiyon ti China Coast Guard kontra kadagiti kameng ti Armed Forces of the Philippines (AFP) a nangisayangkat ti rotation and resupply mission.
Kinuna ni National Security Adviser Secretary Eduardo Año, iti impamatmat ti China Coast Guard ket panagusar ti nalabes a puwersa.
Inlawlawag pay ni Secretary Año, nga uray iti sidong ti Article 15 ti UN Charter ken iti Mutual Defense Treaty, saan a sumrek daytoy iti depenisyon ti armed attack.
Nupay kasta kunana, iti inaramid ti Peoples Republic of China ket panaglabsing iti adu nga international ken domestic laws kas iti panagusar ti illegal force, violation of Convention on Collision at sea, SOLAS, ken International convention on safety of life at sea.
Impaganetget ti sekretaryo a nasken a mangipakita ti self restraint ken panagusar ti nakapya a wagas tapno urnosen iti anyaman a saan a panagkikinna-awatan.
Kabayatanna, awan ti makita a rason ni Año tapno ag convene iti national security council seknan iti Ayungin shoal incident.
Ngem diskresyon kunana ti Presidente nu tarigagay na ti full council meeting.
