Pormal a kiniddaw ti legal team ni sigud a Presidente Rodrigo Duterte iti International Criminal Court (ICC) iti dagos ken awan kondisyon a panakawayawaya ken panakaisardeng dagiti amin nga agdama a proseso kontra kenkuana.
Nagsubmitir da idi kalman, Nobiembre 14, 2025, ti 21 a pinanid ti “Appeal Brief on Jurisdiction” iti Appeals Chamber, a mangkweskwestion iti desision ti Pre-Trial Chamber I idi Oktubre 23, 2025 a pagtalinaaden iti hurisdiksion tapno ituloy iti kaso kontra kenni Duterte.
Impaganetget ti depensa a naaddaan ti dakkel a panagbiddut ti linteg iti ICC para iti nadakamat a ruling, ken tinakderan a naawanan dan iti hurisdiksion kalpasan iti pormal a panagikkat idi ti Pilipinas iti ICC.
Paset iti umuna nga argumento iti panagkedked iti lex specialis, iti depenision ti
“Matter Under Consideration”, ken iti maipagarop a saan a panakairaman ti Prosecutor.
Nakalanad pay iti nainget a panagkiddaw ti depensa iti Appeals Chamber a: “baliktaden iti desisyon; bigbigen nga awan ti hurisdiksion tapno ituloy dagiti proseso kontra kenni Duterte; ken ibaon iti dagos ken awan kondision a panawayawayana.”
Kabayatanna, nangiruar ti nagsina a pammilin iti internasional a korte a mangbukel ti baro a panel dagiti eksperto tapno ammirisen iti kaso ni Duterte.
Nadutokan iti panel a mangipasa ti report, joint wenno individual, iti registry sakbay wenno inton Disyembre 5, 2025.
Nabilin met iti depensa, prosekusion, ken Office of Public Counsel for Victims (OPCV) a mangipaay ti bukod da nga obserbasion seknan iti report ti panel, sakbay wenno inton Disyembre 12, 2025. #
