LA UNION – Inyanunsyo ni Police Regional Office Davao Region (PRO-Davao) Chief, PBGen. Nicolas Torre III nga asidegen a malpas iti panagsapol kenni Pastor Apollo Quiboloy ken dagiti pada na nga akusado.
Segun kenni Torre, agtultuloy a bumas-bassit iti lugar a paggar-garawan ti pastor agsipudta narikos dan dagiti kangrunaan a paset ti Kingdom of Jesus Christ Compound.
Naamwan nga umabot iti 30 nga ektarya ti kalawa ti compound, isunga saan a nalaka a sapolen ti siasinuman nga aglem-lemmeng ken serbian ti warrant of arrest.
Maysa pay a maipagarop a nangpa-bannayat ti panagsapol ket ti saan a pannakitinnulong dagiti miyembro ti grupo, sipud idi umuna nga aldaw a nagturong dagiti pulis iti lugar.
Nupay kasta, saan pay a maibaga ni Torre nu kaatnu a malpas ti panagsukimat da iti lugar a mapapati nga ayan ni Quiboloy.
Iti biang ti KOJC, tinakderan ni Atty. Israelito Torreon nga awan sadiay iti pastor.
Uray ni Vice President Sara Duterte ket imbaga na a nalidem iti presensya ti KOJC leader iti uneg ti compound.
