Inkeddeng ti Supreme Court (SC) a saan a kasapulan ti extrajudicial demand, wenno panagkiddaw iti bayad iti ruar ti korte, sakbay nga judicial demand, malaksid no espesipiko a naibaga dayta iti linteg wenno immanamong dagiti partido.
Iti 14 a pinanid a desision ti Korte Suprema, impaay ti SC Second Division ti petision nga inpila ti maysa a condominium corporation kontra ken ni Hsieh Hsiu-ping, maysa a unit owner, ken ni Edward Lim, a nakagun-od iti unit babaen ti bidding.
Inlawlawag ti desision nga adda kalintegan ti maysa nga agpautang a mangirugi iti foreclosure ken agkiddaw iti bayad, babaen ti korte (judicially) wenno iti ruar ti korte (extra-judicially), no kasapulanen a mabayadanen ti utang.
Ti kaso ket naggapu iti pannakapaay ni Ping a mangbayad iti P4.6 a milion iti association due ti condominium-na, a nagresulta iti pannakaala ti unit na idiay Siudad ti San Juan.
Idi 2012, nailako ti sanikua kenni Lim, a nag-bid iti unit.
Kalpasan a saan a sinaka ni Ping ti unit iti uneg ti maysa a tawen a redemption period, nangipaulog ti lokal a gobierno ti deed a mangiyakar kadagiti sanikua iti nag-bid.
Nangipila ti condominium iti judicial foreclosure sadiay regional trial court, a nagkuna nga inawat ni Lim dagiti dues ni Ping.
Inkeddeng ti RTC a pabor iti condominium, ngem binaliktad dayta ti Court of Appeals (CA).
Nupay kasta, inaprobaran ti SC ti desision ti RTC, ket nalawlawagan a ti foreclosure ket maysa nga alternatibo a remedyo para iti panangurnong iti gatad ti kuarta a mangipatungpal iti obligasion ti nakautang.
