Nainget a pinaglibakan ti sigud a Senador a ni Antonio Trillanes IV dagiti pammabasol a nakaawat isuna ti $2-M manipud kenni sigud a Representative Zaldy Co para ti imbestigasyon ti International Criminal Court (ICC) kontra kenni sigud a Presidente Rodrigo Roa Duterte.
“I vehemently deny that I received $2M or any amount from Zaldy Co for the ICC investigation or any other purpose. This is an attempt to discredit the ongoing ICC proceedings against Duterte”
Gapo kadaitoy ket nakatuding isuna a mangipila ti cyberlibel kontra kada Atty. Levi Baligod, sigud a Rep. Mike Defensor, broadcaster a ni Jay Sonza, 18 a sigud a miembro ti Philippine Marine Corps, ken dadduma pay a mangiwarwaras ti saan nga umiso nga impormasyon.
“This is not new to me. I will not be distracted. Hahabulin ko kayo”
Ti waragawag ni Trillanes ket sungbat iti press conference sadiay Club Filipino nu sadinno ket 18 a sigud a miembro ti Philippine Marines ti nagkuna a nangipatulod ida ti minilyon a gatad kenni Trillanes tapno gastosan ti imbestigasyon ti International Criminal Court.
Segun iti affidavit nga impablaak ni Atty. Baligod, kas executive assistants ni Co ket nabilin da a mangsukat kadagiti dua a maleta a naglaon it tig-P56-M wenno katupag ti aganay $2-M.
Imbatad pay dagiti sundalo a ni Trillanes ti nagbayad kadagiti amin nga hotel accommodations, taraon, lugan, ken dadduma pay a magastos dagiti imbestigador ti ICC idi napan da ditoy Pilipinas, bulan ti Disyembre, tawen 2023.
Pinaglibakan ni Baligod nga iwaras ti kopya ti affidavit kadagiti media agsipud ta ipila da pay ti reklamo sadiay Ombudsman, ken maikkan pay ti kopya ti ICC kasta met dagiti pagilian a miembro na.
Kabayatanna, agtultuloy ita a lawas sadiay The Hague ti confirmation of charges hearing kontra kenni sigud a Presidente Rodrigo Roa Duterte.
Sumangsango isuna kadagiti tallo a bilang ti crimes against humanity gapo iti rinibu a pinnatay babaen ti war on drugs. Ditoy a timbangen ti Korte nu adda ti umdas nga ebidensya tapno agtuloy ti panagdengngeg ti kaso.
