Tinakderan iti International Criminal Court (ICC) ti panagbalin nga ‘independent’ kasaruno nga awagan ni Bise Presidente Sara Duterte a “tuta” da President Ferdinand Marcos Junior ken sigud a Senador Antonio Trillanes IV iti international tribunal.
Iti waragawag na ti sangwanan dagiti suportador ti Duterte idiay ruar ti ICC headquarters ket kinunana a “lapdog ni Trillanes at ni Marcos ang ICC.”
Inakusaran na dagiti dua a nakikumplot iti tribunal tapno maarestar ni sigud a Presidente Rodrigo Roa Duterte seknan iti “War on Drugs” idi administrasyon na.
Impaganetget manen iti Bise Presidente nga “unconstitutional” wenno mailabsing iti linteg ti imbestigasyon ti ICC ditoy Pilipinas.
Kabayatanna, insungbat met ni ICC spokesperson Oriane Maillet a ti tribunal ket maysa nga international judicial institution a mangipatpatungpal iti mandato da a makawaywayas ken ‘neutral’ kas maiyannurot iti Rome Statute.
Inlawlawag pay iti ICC a saan daitoy a mangipaay iti partikular a reaksyon kadagiti waragawag wenno personal a banat kontra kadagiti opisyales ti korte.
Maipalagip nga immunan a pinaglibakan iti Malacañang dagiti alegasyon ni Bise Presidente Sara Duterte, bayat a kinuna met ni Trillanes a saan a ‘tuta’ ti ICC ti uray sino.
Ni Trillanes ti maysa kadagiti nangipila ti communication idiay ICC idi tawen 2017 a kummiddaw iti imbestigasyon iti mapapati a rinibu a natnatay gapo iti gyera kontra droga ti administrasyon Duterte.
