Mabalin a pagbiagan dagiti mannalon, komunidad, ken negosyo dagiti proyekto a mangay-aywan iti aglawlaw iti sidong ti national policy iti carbon market nga imbilin ni Presidente Ferdinand Marcos Jr. babaen ti Executive Order No. 127.
Iti sidong ti sistema, mabalin a makabirok babaen ti panagmula ken panangaywan kadagiti kayo, panagusar ti nalinis nga enerhiya ken dadduma pay nga aktibidad a mangpapababa ti greenhouse gas emissions. Mabalin da pay a makaala ti carbon credits a mailaklako kadagiti kumpanya a kasapulan nga agtungpal iti kari da a pang-aglawlaw.
Segun kenni Executive Secretary Ralph Recto, tarigagay ti Presidente a mataripato iti aglawlaw bayat a makabukbukel ti kanayunan a birok, trabaho, ken oportunidad.
Agbukel iti Department of Environment and Natural Resources (DENR) dagiti allagaden ken Philippine National Carbon Registry tapnu masigurado a beripikado dagiti carbon credit ken maliklikan iti panagloko ken doble a panagbilang kadagitoy.
Idauluan met ti Climate Change Commission iti komite a mangpatungpal ti allagaden, kabinnulig iti Department of Finance.
Mabalin met a mausar dagiti birok manipud carbon credits kadagiti proyekto a mangpapigsa iti proteksiyon dagiti komunidad kontra iti climate change, karaman dagiti natitibker nga imprastraktura ken pasilidad ti danum.
Impaganetget pay ni Recto saan daitoy a baro a buwis iti pammilin, nu di ket panangilatag ti pundasyon para iti maysa a regulado a merkado dagiti carbon credits.
Adda ti 30 nga aldaw ti DENR manipud iti bisa ti pammilin tapnu isubmitir iti singasing a revision iti komite, a maaddaan met ti 30 nga aldaw tapnu aprubaran daitoy.
