Imbandera idiay Senado ti People’s Budget Coalition ti nasurok a ₱1 trilion a gatad dagiti alokasion iti naisingasing a 2027 a national budget a nailasinda nga addaan kadagiti “red flag.”
Iti panagdengngeg ti Senate Finance Committee kadua dagiti civil society organization, kinuna ti coalition co-convenor AJ Montesa a karaman ditoy ti ₱210 bilion a soft pork, ₱695 bilion a hard pork, ken ₱112 bilion a shadow pork wenno unprogrammed appropriations.
Innaig ti grupo ti soft pork kadagiti ayuda a mabalin nga agpannuray iti patronage, bayat nga iti hard pork ket mangdakdakamat kadagiti proyekto ti imprastruktura a mabalin nga impluensiaan dagiti politiko.
Gapu iti daytoy, insingasing ti koalision ti pannakayakar ti pondo manipud iti Medical Assistance for Indigent and Financially Incapacitated Patients wenno MAIFIP iti PhilHealth ken Pantawid Pamilyang Pilipino Program wennu 4Ps.
Insingasingda pay ti nan-anay a pannakaikkat ti guarantee ken referral letter system iti pananggun-od iti medical assistance no diket ipaiman kadagiti maseknan nga ahensia wenno hospital social services ti panangipaulog kadagiti kasapulan a dokumento.
Kiniddawda pay iti nalawag a processing timeline ken priority lanes para kadagiti emerhensia a mainaig iti pannakaagas ken pannakaitabon.
Kabayatanna, kinuestiyon met ti grupo ti dandani 7,000 a proyekto nga aggatad iti ₱190 bilion a mapapati nga awanan ti naikapet a dokumentasion a makita ti publiko.
Segun kenni coalition co-convenor Kenneth Ibasco Abante, saanna a kayat a sawen nga adda korapsion kadagiti amin a proyekto, ngem impaganetgetna a masapul nga adda umdas ken nalawag a dokumentasion para kadagiti proyekto a mapondoan manipud iti buis ti umili, Innayonna pay a posible manen a maaddaan ti flood control scandal dagiti dadduma nga ahensiya.
Nagpanawagan daytoy iti Senado nga ikkaten iti naisingasing a badyet dagiti proyekto nga awananan ti naidatag a dokumento ken inallukoy ti Presidente a saan nga aprobaran dagitoy.
Impeksa pay ni Abante ti pannakaseknanna iti mapapati a kinakurang ti sungbat dagiti sumagmamano a mammanday-linteg iti Kamara kadagiti panawagan iti budget reform. Nupay kasta, nagyaman kadagiti senador gapu iti panagdengngegda kadagiti singasing dagiti budget advocates.
Kabayatanna, manamnama nga agtataripnong ti Bicameral Conference Committee inton maikadua a lawas ti Disiembre tapno pagsasaritaan ti naisingasing a 2027 national budget nga aggatad iti ₱7.2 trillion.
