BR LA UNION – Sumango latta dagiti undocumented Filipino immigrants idiay Estados Unidos iti deportation crackdown ti administrasyon Trump kontra kadagiti illegal immigrants.
Segun kenni Philippine Ambassador to the United States Jose Manuel Romualdez, sumagmamano a simmangpet a Filipino ti nagkuna a nakaawat da ti abiso a mapasubli da ditoy Pilipinas.
Saan pay man nga ammo ti bilang dagiti apektado nga indibidwal, ngem kaadwan kadakuada ket manipud estado nga addaan ti dadackel a komunidad dagiti Filipino, kas idiay California, New York, ken New Jersey.
Inallokoy ni Romualdez dagiti apektado a Pinoy nga adda pay laeng idiay U.S. nga agsapol ti legal a wagas tapno agtalinaed dagitoy ioti nasao a pagilian.
Maipalagip a ti nasao a crackdown ket gapu kadagiti report nga idi Enero ket adda ti 24 nga undocumented Filipino a karaman iti “petty crimes” iti nai-deport iti sidong ti administrasyon.
Innayon pay ti Embahada a dagiti Pinoy nga agnanaed idiay U.S. ti nasurok lima a tawen, agtrabtrabaho, ken agbaybayad ti buwis ket addaan ti nangatngato a tyansa a maaramid a legal ti panagtalinaed da, nangruna nu simrek dagitoy iti pagilian babaen ti maysa a valid work visa, a nupay nagpason daytoy.
Ngem impaganetget ti embahada a sabali met ti sitwasyon kadagiti nagturong idiay Amerika babaen ti tourist visa.
Nabiit pay nga inyuswat ti U.S. Department of Homeland Security iti maysa nga ad campaign a mangal-allokoy kadagiti illegal immigrants a boluntaryo a pumanaw iti nasao a pagilian ken liklikan iti posible a deportation.
