BR LA UNION – Pinaglibakan ti Korte Suprema a nakaawat daytoy ti petition a kumidkiddaw para iti resignation ni President Ferdinand Marcos Jr.
Immunan a nagwaras ti impormasyon iti social media a mangibagbaga nga adda petisyon a naidatag iti kangatuan a pagukuman ken naglaun ti 16 million signature, a mangkidkiddaw ti panag-resign ti Presidente.
Iti fabricated document, segun iti SC ket napetsaan ti March 16, 2025 ken nadakamat a naggapo daytoy iti Supreme Court Spokesperson.
Impaganetget ti Korte Suprema nga awan kinapudno na iti nasao a dokumento ken saan met a nangiruar ti tagapagsarita iti kapada a waragawag.
Nakailanad pay iti nasao a dokumento a nakatuding nga ag-convene ita nga aldaw (March 17) iti Supreme Court En Banc tapno pagsaritaan ti nasao a petisyon.
Naminsan pay nga impaganetget ti SC nga awan met kinapudnona daytoy ken awan met ti naituding a session ita nga aldaw iti En Banc.
Pinaglibakan pay ti kangatuan a korte iti immunan a nagwaras a report a rimuar idi March 11 a mangibagbaga a nangipaulog ti temporary restraining order (TRO) iti petisyon seknan iti pannaka-aresto ti sigud a presidente.
Kinuna ti SC, amin dagitoy a biddut nga impormasyong ket dumalan iti umno nga aksyon.
Siniguro ti korte a maimbestigaran amin dagitoy ken maipaayan ti umno nga addang, agraman ti panangipataw ti umiso a sanction iti siasinuman a responsable.
Kabayatanna, partikular a dinakamat ti SC dagiti facebook account a ‘Choose Libungan’ ken ‘Bernard Flores Maicon’ a dua kadagiti nagiwaras iti nasao a biddut nga impormasyon.
Inallokoy ti SC iti publiko nga agibasar laeng iti official announcement nga ir-irwar iti official website ti Korte Suprema ti Pilipinas (sc.judiciary.gov.ph).
